„Ég er með nokkrar ljósmyndir sem ég tók þegar ég var að sitja yfir á Feneyjatvíæringnum. Ekki samt af listaverkum á tvíæringnum sjálfum heldur af stólum sem voru í kring um mig dags daglega. Þeir breyttu um svip eftir sjávarföllum, veðri og sólarstöðu,“ segir Ragnheiður Maísól Sturludóttir, ein sexmenninganna sem sýna um þessar mundir í SÍM-salnum í Hafnarstræti 16 í Reykjavík.
Hin eru Emma Heiðarsdóttir, Hrönn Gunnarsdóttir, Magnús Skúlason, Ólöf Rún Benediktsdóttir og Þorgerður Þórhallsdóttir.
Sýningin nefnist Ufsilon og á henni eru svo ólík verk sem teikningar af öpum, vídeóverk af skóm og sjálfsmynd einnar listakonunnar sem breytist eftir því sem líður á sýninguna.
Ein listakonan vinnur með eigin myndir og fundnar og breytir þeim með lýsingu en eini strákurinn er talsvert karllægari.
„Magnús er með valdainnsetningu sem er fókuseruð kringum byssu, eins og í góðri uppskrift að kynhlutverkinu,“ segir Ragnheiður Maísól hlæjandi.
Hún segir verkin á sýningunni ekki unnin út frá neinu þema. „Það eina sem við eigum öll sameiginlegt er að við útskrifuðumst vorið 2013 úr Listaháskólanum og erum að stíga okkar fyrstu skref úti í hinum stóra heimi utan skólans,“ segir hún.
Spurð hvort hún sé í fullri vinnu í listinni, svarar Ragnheiður Maísól: „Nei, ekki ennþá. Ég er að vinna í félagsmiðstöð og er líka í Sirkus Íslands en samt eyði ég mestum tíma í myndlistina. Það eru forréttindi að fá að vinna við það sem manni þykir skemmtilegast.“
Sýningin stendur til 24. mars og verður opin alla virka daga milli klukkan 10 og 16.
KR
Fram
