Honda hættir framleiðslu á Evrópuútgáfu Accord

Honda hefur framleitt Accord bílinn til langs tíma í tveimur útgáfum, annarri fyrir Evrópumarkað og Ástralíu og hinni fyrir Bandaríkjamarkað. Vel hefur gengið að selja Honda Accord vestanhafs en síður að undanförnu í Evrópu og Ástralíu. Því hefur Honda tekið þá ákvörðun að hætta smíði Accord fyrir Evrópu og Ástralíu um miðbik næsta árs.

Sá sem smíðaður er fyrir Bandaríkin er breiðari bíll, með stærri vélar og langt frá því eins í útliti og sá evrópski. Honda hefur náð góðum árangri í sölu minni fólksbíla í Evrópu, sem og jepplinga eins og Honda CR-V. Ver hefur gengið hjá Honda eins og mörgum öðrum framleiðendum með stærri gerðir fólksbíla í álfunni. Vel hefur hinsvegar gengið hjá þýsku lúxusbílaframleiðendunum að selja stóra fólksbíla.

Svo virðist sem á síðustu árum hafi kaupendur sem á annað borð hafa efni á að kaupa stóra fólksbíla, sem eyða meira en smábílar, velji það að uppfæra uppí lúxusbíla. En á meðan hefur sala ódýrari stærri fólksbíla minnkað. Engar áætlanir eru uppi um sölu bandarísku Accord gerðarinnar í Evrópu.