Bílabúð Benna hefur sölu á Opel

Einsog fram hefur komið hefur Bílabúð Benna tekið við söluumboði Opel á Íslandi og mun fyrirtækið kynna glæsilega bílalínu frá Opel á opnunarsýningu um helgina. 

Það verður gert í gerbreyttum sýningarsal Bílabúðar Benna á Tangarhöfða. Þar verða frumsýndir fjöldi nýrra bíla frá Opel sem ekki hafa sést áður hér á landi.

„Þetta eru spennandi tímamót hjá okkur,“ segir Benedikt Eyjólfsson hjá Bílabúð Benna. „Opel merkið er á mikilli uppleið í Evrópu, sala og markaðshlutdeild hefur aukist umtalsvert þar. Undanfarin ár hefur Opel fjárfest gríðarlega í þróunarstarfi og það hefur verið að skila sér í ótal hönnunar- og gæðaverðlaunum,“ segir Benedikt.

Í tilkynningu frá Bílabúð Benna kemur fram að fyrirtækið mun bjóða  upp á sérstaka Opel fjármögnun sem er nýjung hér á landi. Um er að ræða óverðtryggt lán til 5 ára, í íslenskum krónum, með aðeins 5.95% föstum vöxtum og miðað við 40% útborgun. Opnunarsýning Bílabúðar Benna stendur yfir laugardag og sunnudag frá kl. 12 – 16. Léttar veitingar í boði, blöðrur og ís fyrir börnin.