Toyota fer ótroðnar slóðir

Toyota kynnir þennan fjölnota bíl á World Maker Faire sýningunni í New York seinna í mánuðinum en sú sýning er haldin af tímaritinu Make og ætlað fólki sem gerir hlutina sjálft (Do It Yourself). Bíllinn hefur fengið nafnið Toyota Urban Utility, eða U2.

Þessi bíll er einmitt ætlaður fólki með ævintýraþrá, fólki sem fer mikið út fyrir borgarmörkin og hefur ýmislegt í farteskinu á leið sinni til ævintýra. Toyota vill meina að skortur sé á smærri bílum sem þjóni slíkum þörfum, þ.e. minni bílum en jeppum með enn meira notagildi.

Þessi bíll er með flutningsgetu á við smærri sendibíl, meira notagildi en pallbíll og ótrúlegan sveigjanleika. Fjarlægja má eða leggja niður aftursæti en einnig farþegasæti að framan. Mikið er af allskonar festingum í bílnum fyrir útvistargræjur og innanrýmið er gert úr nautsterkum efnum sem þola eiga mikið álag.

Afturhlerinn leggst flatur og hefur styrk til að sitja eða standa á honum. Þakið má opna að fullu og setja má slá þvert á afturenda bílsins til stuðnings farangurs. Að innan eru hjólafestingar fyrir reiðhjól. Toyota fer því ótroðnar slóðir og býður fólki bíl fyrir ótroðnar slóðir.