Einvalalið tónlistarmanna kemur að Karlsvöku

Samferðamenn, velunnarar og aðdáendur tónlistarmannsins ástsæla, Karls J. Sighvatssonar, vinna nú hörðum höndum að undirbúningi stórtónleikanna Karlsvöku í Eldborg Hörpu þann 12. september næstkomandi.

Öll helstu verk Karls verða flutt á tónleikunum, meðal annars af  rokksveitum, blönduðum kór og Victorchestra stórsveitinni undir stjórn Viktors Orra Árnasonar úr Hjaltalín, en hann hefur átt veg og vanda af fjölda útsetninga sem fluttar verða þetta kvöld.

Í hópi söngvara á Karlsvöku eru Björgvin Halldórsson sem flytur meðal annars Pílagrímakórinn og Jónas R. Jónsson sem þekktastur er fyrir Gluggann og Slappaðu af, en bæði Jónas og Björgvin störfuðu með Karli í Flowers.

Hljómsveitin Hjaltalín mun koma fram þetta kvöld auk þess sem forsöngvari sveitarinnar Högni Egilsson mun syngja tímamótaverkið Hallgrímur kvað? , eina af þekktari tónsmíðum sem Karl kom að.

Þá munu Trúbrots-félagarnir Gunnar Þórðarson og Magnús Kjartansson koma fram, einnig Pálmi Gunnarsson, Magnús Eiríksson og hljómsveitinni Mannakornum. Megas mun flytja lag við undirleik Karls sáluga af hljóðbandi og Apparat Organ Kvartett kemur fram auk Ólafs Arnalds sem flytur tvö ný verk á tónleikunum.

Allur ágóði af tónleikunum rennur í Minningarsjóð Karls J. Sighvatssonar sem stofnaður var 1991 , sama ár og Karl lést, en sjóðurinn hefur styrkt á fjórða tug ungra hljómborðsnema til framhaldsnáms í útlöndum, styrkt viðgerðir og kaup á orgelum, útgáfu nótna og svo mætti lengi telja.