Uppselt í hópferðina á San Siro

Uppselt er í hópferð Úrval Útsýnar á leik Stjörnunnar og Inter í Mílanó þann 28. ágúst næstkomandi en þetta staðfesti Sigurður Gunnarsson, deildarstjóri íþróttadeildar Úrvals Útsýns við Vísi rétt í þessu.

Um er að ræða einn stærsta leik sem íslenskt félagslið hefur leikið og var mikil eftirspurn eftir miðum.

„Við settum þetta af stað klukkan 5 í gær og þetta kláraðist í hádeginu í dag. Það var tæpur sólarhringur sem þetta tók. Við vorum með 174 sæti,“ sagði Sigurður sem útilokaði ekki að bætt yrði við sætum.

„Við erum að skoða okkar möguleika þar, við viljum hjálpa sem flestum og við erum að líta á 2-3 möguleika en það verður aldrei neitt gríðarlegt magn. Það er ekki á hverjum degi sem íslenskt lið leikur á San Siro,“ sagði Sigurður sem staðfesti að hægt væri að kanna möguleikann á að fá staka miða á leikinn.

„Það má senda okkur póst og sjá hvað við getum gert.“