Juventus nælir í eitt mesta efni heims

Forráðamenn Juventus eru himinlifandi yfir því að hafa náð að kaupa framherjan Alvaro Morata frá Real Madrid fyrir 20 milljónir evra. Morata gerði fimm ára samning við Juventus.

Giuseppe Marotta stjórnarmaður Juventus segir Morata vera einn efnilegasta leikmann heims. Það tók Juventus nokkurn tíma að telja Real Madrid á að selja hinn 21 árs gamla framherja.

„Hann er 21 árs gamall, kemur frá Real Madrid og er eitt mesta efnið í evrópskum fótbolta,“ sagði Marotta þegar hann kynnti Morata til sögunnar.

„Hann vann  tvo titla með U-19 og U-21 árs landsliðum Spánar og vann gullskóinn í bæði skiptin. Hann lék í sigri Real Madrid í Meistaradeild Evrópu.

„Hann var sex ár hjá Real Madrid og hefur upplifað sigra og kynnst hugarfari sigurvegarans. Allt þetta fékk okkur til að velja hann.

„Það var erfitt að semja um kaupin. Real Madrid vildi halda honum og önnur lið vildu kaupa hann líka. Ástæða þess að Alvaro er hér er að hann vildi klæðast þessari stórkostlegu treyju.

„Real á rétt á því að kaupa hann aftur en leikmaðurinn er hér og mun öðlast frábæra reynslu hjá okkur. Við vonum að hann verði hér lengi enda gerðum við fimm ára samning við hann,“ sagði Marotta.