Red Bull bíllinn betri en Renault vélin

Daniel Ricciardo ökumaður Red Bull telur að bilið á milli Renault og Mercedes vélanna sé sóun á getu Red Bull bílsins.

Munurinn á milli Mercedes og Renault er einna greinilegastur á beinum köflum. Ricciardo telur að Red Bull bíllinn hafi meira að bjóða en Renault vélin getur gert honum kleift að sýna.

„Ekki misskilja mig, þetta er þreytandi. Þetta er erfitt vegna þess að það munurinn er svo mikill á beinu köflunum og það þarf enga hæfileika á beinu köflunum. Þetta er tilgangslaus sóun á getu. Ekki misskilja mig, það getur hver sem er hoppað um borð sem er ekki hræddur við að fara á 300 km/klst þá getur þú auðveldlega botnað Formúlu 1 bíl á beinum kafla,“ sagði Ricciardo.

„Við höfum varið tíma og peningum í að hanna bíl sem er fljótur í beygjum en sú vinna verður að engu á beinu köflunum. Það er það sem er þreytandi. En þetta er eins og þetta er,“ sagði Ricciardo.

Ricciardo vill forðast að vera of beittur í gagnrýni sinni á Renault enda er hann á sínu fyrsta tímabili hjá Red Bull.

„Ég er nýr í liðinu svo ég ætla ekki að koma hérna inn og byrja að grýta hlutum um herbergið og segja hvernig hlutirnir eiga að vera, það er annað fólk í því. Ég ek bara þeim bíl sem ég fæ. Ég trúi því að við getum snúið þessu við, þetta ár er að renna út í sandinn en fyrir 2015 hef ég trú á að við getum hiklaust bætt okkur,“ sagði Ricciardo að lokum.

Liðsfélagi Ricciardo, fjórfaldi heimsmeistarinn Sebastian Vettel hefur ekki verið eins varkár í gagnrýni sinni á Renault. Hugsanlega er Ricciardo að vísa til þess þegar hann segir að aðrir séu í því að grýta hlutum til og frá.