Pepe Reina spilar með Liverpool á næsta tímabili

Umboðsmaður spænska markvarðarins Pepe Reina segir að leikmaðurinn sé á leiðinni aftur til Englands og að Reina muni spila á ný með Liverpool á komandi tímabili.

Pepe Reina var í láni hjá ítalska liðinu Napoli á þessu tímabili og Rafael Benitez, þjálfari Napoli, vill halda honum. Napoli er hinsvegar ekki tilbúið að kaupa spænska landsliðsmarkvörðinn frá enska liðinu ef marka má nýjustu fréttir frá Ítalíu.

„Vangavelturnar um framtíð Pepe Reina hafa ekkert farið framhjá mér en ég get staðfest það að Pepe Reina mun spila með Liverpool á næsta tímabili. Hann mun virða samning sinn við Liverpool," sagði Manuel García Quilón, umboðsmaður Reina í viðtali við ítalska fjölmiðla.

Belginn Simon Mignolet tók stöðu Pepe Reina í marki Liverpool á síðustu leiktíð þar sem Liverpool varð í 2. sæti í deildinni. Pepe Reina stóð sig vel í marki Napoli, spilaði í Meistaradeildinni og vann ítalska bikarinn.