Stórlaxaopnun í Víðidalsá

Víðidalsá opnaði í morgun og það er óhætt að segja að þar hafi ekkert nema stórlaxar verið við bakkann.

"Við erum mjög ánægðir með þessa veiði í morgun og það var gaman að sjá fisk upp um alla á" sagði Jóhann Hafnfjörð Rafnsson leigutaki Víðidalsár þegar við heyrðum í honum í dag.  Alls komu 6 laxar á land á vaktinni en sett var í 10 þar af einn sannkallaðann Víðidalsárrisa sem vanir menn töldu ekki undir 100 sm og þykkur eftir því en sá slapp í veiðistaðnum Dæli.  Laxinn er kominn upp um alla á og til vitnis um það veiddust laxar í Laxapolli í Fitjá en það er ekki algengt að sjá lax svo ofarlega fyrstu veiðidagana.  Stærsti laxinn sem kom upp var 92 sm og veiddist í Efri Kæli en þar kom einnig annar stórlax á land.  Mikið líf var í Harðeyrarstreng eins og venjulega en alls komu 3 laxar á land þar og mikið líf var í öllum veiðistaðnum.  Þetta er frábær opnun í Víðidalsá og það verður spennandi að sjá framhaldið næstu daga en menn eru farnir að spá góðu stórlaxasumri á norðurlandi því enn sem komið er sést varla neitt nema lax um og yfir 80 sm og það kvartar engin yfir því.