Bílar

Olís opnar metanafgreiðslu í Álfheimum

Finnur Thorlacius skrifar
Metanafgreiðslustöð Olís í Mjódd.
Metanafgreiðslustöð Olís í Mjódd.
Olís hefur opnað nýja og fullkomna metanafgreiðslu á þjónustustöð félagsins í Álfheimum í Reykjavík. Metan er íslenskt eldsneyti, mun umhverfisvænna en annað eldsneyti og talsvert ódýrara. Metanið er framleitt í Álfsnesi og unnið úr hauggasi sem verður til úr lífrænum úrgangi sem þar er urðaður. Við vinnsluna verður til vistvænt íslenskt eldsneyti.

 ,,Olís opnaði fyrstu metanafgreiðslu sína á þjónustustöð félagsins í Mjódd síðastliðið sumar og við finnum fyrir mikilli ánægju með hana meðal fjölmargra notenda metanbifreiða. Með opnun metaafgreiðslu í Álfheimum aukum við til muna þjónustu okkar við notendur metanbifreiða sem hefur farið fjölgandi á Íslandi á liðnum árum.

Það er ánægjulegt að geta boðið íslenskt, vistvænt eldsneyti. Það er þjóðhagslega hagkvæmt, sparar gjaldeyri, skapar störf og er liður í sjálfbærni þjóðarinnar,“ segir Jón Ó. Halldórsson, framkvæmdastjóri smásölu- og eldsneytissviðs Olís. Metanafgreiðsla verður einnig opnuð á Akureyri.

 Um áramótin tóku gildi ný lög um endurnýjanlegt eldsneyti í samgöngum á landi. Þau kveða á um skyldu olíufélaganna til að tryggja að ákveðið hlutfall eldsneytis til samgangna sé af endurnýjanlegum uppruna. Olís hafði þá þegar uppfyllt þessi skilyrði.  Olís kynnti vorið 2013 fyrst íslenskra olíufyrirtækja díselolíu blandaða með VLO, eða vetnismeðhöndlaðri lífrænni olíu, sem er hreinna og umhverfisvænna díseleldsneyti en þekkst hefur. ,,Öll þessi grænu skref eru í samræmi við umhverfisstefnu félagsins,“ segir Jón ennfremur.

Mest lesið




×

Mest lesið