Soffía skoraði í tapi Jitex

Landsliðskonurnar Sara Björk Gunnarsdóttir og Þóra B. Helgadóttir léku allan leikinn fyrir FC Rosengård sem vann Eskilstuna United með þremur mörkum gegn engu í sænsku úrvalsdeildinni í fótbolta í dag.

Anja Mittag, Ramona Bachmann og Elin Rubensson skoruðu mörk Rosengård sem situr á toppi deildarinnar með 15 stig eftir sex leiki.

Soffía Arnþrúður Gunnarsdóttir skoraði þegar lið hennar Jitex tapaði 2-3 á heimavelli fyrir AIK. Soffía, sem varð Íslandsmeistari með Stjörnunni 2011 og 2013, kom Jitex 2-1 yfir þegar fimmtán mínútur voru til leiksloka. AIK skoraði hins vegar tvö mörk á sex mínútna kafla undir lokin og tryggði sér sigurinn.

Úrslit dagsins:

Umeå 6-1 Vittsjö

Jitex 2-3 AIK

KIF Örebro 3-2 Piteå

Rosengård 3-0 Eskilstuna