Ferrari hefur enn trú á Raikkonen

James Allison, tæknistjóri Ferrari-liðsins í formúlu eitt, trúir að Kimi Raikkonen nái að yfirstíga vandræðin sem hafa verið að hrjá hann að undanförnu. Tilraunir finnska ökumannsins til að berjast við liðsfélaga sinn, Fernando Alonso hafa hingað til mistekist.



Í Kína endaði Alonso í þriðja sæti en Raikkonen í því áttunda, rúmum 50 sekúndum á eftir Alonso.

„Kimi er að vinna mjög vel með liðinu, hann á góð samskipti við verkfræðingana sína, við hinn bílinn hinu megin í bílskúrnum, hjálpar okkur að þróa þennan bíl,“ segir Allison um Finnan.

Allison segir Raikkonen sýna fagmennsku á öllum sviðum og er þess fullviss um að hann muni fljótlega fara að sýna betri árangur á brautinni.

Tæknistjórinn lýsir frammistöðu Alonso sem „óaðfinnanlegri“.

„Hjá Fernando höfum við séð eins og venjulega óaðfinnanlega frammistöðu, sækir hvert einasta mögulega stig við hvert tækifæri. Við verðum að þakka honum fyrir það sem hann hefur náð að gera með þennan bíl hingað til á tímabilinu,“ sagði Allison að lokum.