Toni með tvennu í sigri Verona

Gamla brýnið Luca Toni skoraði tvö mörk fyrir Verona sem bar sigurorð af Catania með fjórum mörkum gegn engu.

Toni skoraði fyrra mark sitt eftir aðeins sex mínútna leik og hann bætti svo við marki á 28. mínútu. Toni hefur nú skorað 20 mörk í Serie A, en hann er markahæstur í deildinni ásamt Ciro Immobile, leikmanni Torino.

Brasilíumaðurinn Marquinho skoraði þriðja mark Verona á lokamínútu fyrri hálfleiks, en það var síðan Juan Gomez Taleb sem gulltryggði sigurinn þegar hann skoraði á 75. mínútu.

Emil Hallfreðsson lék allan leikinn á miðjunni fyrir Verona sem komst með sigrinum upp í 6. sæti deildarinnar.