Pútín segir aðgerðir Rússa á Krímskaga mannúðlegar

Vladímír Pútín Rússlandsforseti sagði að hagsmunir rússneskumælandi Úkraínumanna yrðu varðir með öllum tiltækum ráðum.

Þetta kom fram í máli hans á fréttamannafundi sem lauk nú rétt í þessu.

Pútín sagði að uppreisnin í Úkraínu stríddi gegn stjórnarskrá landsins og bæri öll merki vopnaðs valdaráns.

Forsetinn sagði að fyrrum forseti Úkraínu, Viktor Janúkóvitsj, hafi samþykkt allar kröfur stjórnarandstöðunnar og að hann skildi kröfur Úkraínumanna um rótttækar breytingar í landinu en að standa þyrfti að þeim löglega.

Rússlandsforseti sagði enga þörf á því að senda hermenn inn í Úkraínu þó möguleikinn á því væri enn til staðar. Innrás væri síðasta úrræðið sem stjórnvöld hans myndu grípa til.

Pútín sagði einungis hluta úkraínska þingsins starfa í löglegu umboði þjóðarinnar en aðrir angar stjórnkerfsins gerðu það ekki, hvað þá Túrkínov, bráðabirgðaforseti landsins.

Pútín lýsti yfir fullum stuðningi við Viktor Janúkóvitsj sem að hans mati er enn forseti landsins í ljósi þess að hann hafi ekki enn sagt af sér eða látist í embætti.

Pútín: „Nasistar og gyðingahatarar leika nú lausum hala í Úkraínu, sérstaklega Kænugarði, og íbúar austari hluta landsins eru uggandi.“

Rússar muni beita sér fyrir því að verja hagsmuni þeirra gegn ofsóknum fyrrgreindra hópa með öllum tiltækum ráðum.

Pútín rakti vandaræði á rússneskum mörkuðum til stefnu bandaríska seðlabankans en ekki atburðana í Úkraínu.

Forsetinn svaraði alþjóðlegum gagnrýnisröddum um að aðgerðir Rússa væru ólöglegar.

„Sjáið hvernig Bandaríkjamenn hafa hagað sér í Afghanistan, Írak og Líbýu. Íhlutun okkar er réttmæt því forseti Úkraínu falaðist eftir þessum aðgerðum. Við viljum standa vörð um hagsmuni fólksins á Krímsskaga, það er mannúðlegt. Við viljum ekki hneppa neinn í þrældóm.“

„Þeir sem tala fyrir viðskiptaþvingunum ættu að hugsa um afleiðingarnar því skaðinn af þeim yrði gagnkvæmur,“ sagði Pútín og beindi orðum sínum til Johns Kerry sem mælti fyrir slíkum aðgerðum í gær.

Pútín neitaði því að hermennirnir sem gengu nú um Krímskaga og hertækju flugvelli væru á hans vegum. Þar væru á ferðinni innfæddir hermenn sem hygðust verja sig gegn öfgahópum í landinu. „Búningarnir eru þó mjög svipaðir rússneskum herbúningum,“ bætti Pútín við.

Rússlandsforseti að hann hefði ekki í hyggju að innlima Úkraínu en að hann hvetti „íbúa Krímskagans til að nýta sér sjálfsákvörðunarréttinn.“

Vladímír Pútín áréttaði að samskiptum við stjórnvöld í Úkraínu verði einungis komið á þegar löglega kjörnir fulltrúar sitja þar við völd.

Hann útilokaði ekki að Gazprom myndi stöðva flutninga á gasi til Úkraínu því þarlend stjórnvöld hefðu ekki staðið í skilum.