Mótmælendur í Kænugarði endurskipuleggja sig

Loft var lævi blandið í morgun í Kænugarði, höfuðborg Úkraínu, en í gær sló mótmælendum og lögreglu saman með þeim afleiðingum að tugir manna létust og fjöldi manna særðust.

Aðgerðarsinnar í helstu mómælendabúðunum, the Maidan, hafa í nótt verið að manna götuvígin en engar fréttir af átökum hafa borist enn sem komið er. Landið er sagt á barmi borgarastyrjaldar og í gær bárust fréttir af því að leyniskyttur lögreglu beindu rifflum sínum að mótmælendum. Misvísandi tölur eru um mannfall. Í gær greindi Reuters-fréttastofan frá því að tölur af mannfalli séu mjög á reiki. Fréttastofa CNN hefur eftir úkraínskum fjölmiðlum að meira en hundrað manns séu látnir eftir átökin í gær. BBC sagði tölu látinna á milli 21 og 27.

Friðarsamkomulag í höfn

Uppfært 08:30

CNN greinir frá því, og hefur eftir yfirvöldum í Úkraínu, að tala látinna sé ekki eins mikil og óttast hafði verið; 77 hafi látist í átökunum og særðir séu 577, þar af eru nú 369 á sjúkrahúsi. Viðræður stóðu í alla nótt. Þeim lauk 7:20. Þá tilkynnti Viktor Janúkovítsj forseti að samkomulag hafi náðst um vopnahlé en aðkomu að þeim viðræðum áttu utanríkisráðherrar Frakklands, Þýskalands og Póllands.