Emil byrjaði í sigurleik

Emil Hallfreðsson var að vanda í byrjunarliði Hellas Verona í 2-1 sigri Verona gegn Sassuolo í ítölsku deildinni í dag.

Emil spilaði 88 mínútur í leiknum og fór útaf í stöðunni 2-0 fyrir Verona. Sassuolo minnkaði muninn í uppbótartíma en náði ekki að stela stigi á lokametrunum. Stigin þrjú skjóta Verona aftur upp fyrir Inter í fimmta sæti en Inter á leik til góða gegn Juventus í kvöld.

Leik Roma og Parma var frestað í dag eftir ellefu mínútna leik vegna veðurs. Eftir nokkrar tilraunir til að fá boltann til að skoppa komst dómari leiksins að þeirri niðurstöðu að ekki væri hægt að spila áfram og blés hann leikinn því af með samþykki leikmanna.

Að lokum tekur Juventus á móti Inter í slagnum um Ítalíu í kvöld en gríðarlegur rígur er á milli liðanna. Juventus hefur ekki tapað síðan 20. október í deildinni og er með sex stiga forskot á Roma á toppi deildarinnar.

Úrslit dagsins:

Atalanta 3-0 Napoli

Catania 2-3 Livorno

Chievo 0-2 Lazio

Sassuolo 1-2 Verona