Trommari Slipknot segist ekki hafa hætt í hljómsveitinni

Joey Jordison, trommari og stofnmeðlimur bandarísku hljómsveitarinnar Slipknot, neitar þeim fregnum að hann hafi hætt í hljómsveitinni. En það var í síðasta mánuði sem tilkynnt var að trommarinn hafi sagt skilið við hljómsveitina vegna persónulegra ástæðna.

Nú hefur Jordison sent yfirlýsingu á Metal Hammer þar sem fram kemur að hann hafi ekki hætt í sveitinni. Hann heldur því fram að Slipknot hafi verið líf hans síðustu 18 árin og hann myndi aldrei gera aðdáendum sínum þann óleik að segja skilið við hljómsveitina.

Trommarinn hélt svo áfram og sagði að fréttirnar hefðu komið honum jafn mikið á óvart og öllum öðrum en af lagalegum ástæðum gæti hann ekki sagt meira.

Það er því nokkuð ljóst að ansi mikið hefur gengið á í herbúðum Slipknot að undanförnu en fyrir jól mætti söngvari þeirra, Corey Taylor, í viðtal við bandaríska útvarpsstöð þar sem hann staðfesti þær fréttir að Joey Jordison væri ekki lengur meðlimur í Slipknot en neitaði að segja meira um málið.



Síðasta plata Slipknot kom út árið 2008 og er það platan All Hope Is Gone. En hljómsveitin hefur ekki tekið upp neitt nýtt efni frá því að bassaleikarinn Paul Grey lést af of stórum fíkniefnaskammti. Slipknot hefur þó komið fram á stöku tónleikum að undanförnu og þegar að hljómsveitin kom fram á Download hátíðinni á síðasti ári gáfu þeir í skyn að nýtt efni væri væntanlegt frá hljómsveitinni.