Hvernig gerir þú Könglaseríu?

Könglar hafa löngum verið vinsælir til skreytinga um jólin. Það er ekki að ástæðulausu enda leið til að færa náttúruna á fallegan hátt inn á heimilið. Hægt er að tína köngla af sígrænum trjám, misstóra og misjafnlega opna eftir aldri. Þá er um að gera að búa til samverustund með fjölskyldunni og fara saman út í náttúruna að tína köngla.

Þú þarft:

köngla 5-8

snæri, gróft 1-2 m

límbyssu

lím

1. Best er að nota köngla sem eru vel opnir. Ef þú finnur einungis lokaða köngla, settu þá á ofn í nokkra daga og þeir munu opnast.

2. Klipptu snæri í hæfilegri lengd. 

3. Notaðu límbyssuna til að líma könglana saman við snærið og passaðu upp á að hafa jafnt bil á milli. Þrýstu snærinu vel að könglinum. 

4. Leyfðu líminu að þorna og hengdu svo seríuna upp.

5. Til þess að gera seríuna ennþá jólalegri er hægt að mála könglana með gulllitaðri eða hvítri akrílmálningu.