Hlaðin lofi

Ný plata hljómsveitarinnar Hjaltalín, Enter 4, hefur hlotið frábæra dóma frá gagnrýnendum tímarita á borð við Clash, Sunday Times, Mojo og Q. Gagnrýnandi The Sunday Times segir meðal annars þetta um plötuna: „Þetta er ein magnaðasta plata sem ég hef nokkru sinni hlustað á. Sannkallað meistaraverk.“

Gagnrýnandi Mojo lýsir samsöng Sigríðar Thorlacius og Högna Egilssonar sem einkar skemmtilegum og gefur Enter 4 fjórar stjörnur líkt og gagnrýnandi Q. Hjaltalín er ein þeirra sveita er munu koma fram á tónlistarhátíðinni Iceland Airwaves í lok október.