Vill ekki vera Annie

Will Smith sagði fyrst frá því í janúar 2011 að hann ætlaði að framleiða endurgerð söngvamyndarinnar Annie og átti dóttir hans, Willow Smith, að fara með hlutverk hinnar munaðarlausu Annie. Nú hefur hins vegar komið í ljós að Willow mun ekki leika í kvikmyndinni.

Will Gluck hefur verið fenginn til að leikstýra myndinni og sagði í viðtali við Deadline.com að Willow væri orðin of gömul til að fara með hlutverk Annie. Faðir söng- og leikkonunnar segir þó aðra ástæðu fyrir því að dóttir hans hafi dregið sig í hlé.

„Willow fannst erfitt á tónleikaferðalagi með lagið Whip My Hair og sagði við mig: „Veistu pabbi, ég held ekki.“ Ég bað hana að hugsa sig vel um og sagði: „Hlustaðu á, þú verður í New York með öllum vinum þínum og Beyoncé verður þar líka. Þú munt syngja og dansa.“ Þá horfði hún bara á mig og sagði: „Ég er með betri hugmynd. Hvað ef ég fæ bara að vera tólf ára?“,“ sagði Will Smith um málið.