Nýr 300 manna tónleikastaður við Tryggvagötu

"Það er mikið lagt upp úr útlitinu á staðnum, hljómburðinum og allri aðstöðu fyrir tónleika- og viðburðahald,“ segir skemmtistaðaeigandinn Steindór Grétar Jónsson. Steindór er einn eigenda nýs skemmtistaðar sem ber nafnið Volta og opnar um næstu helgi. Sömu aðilar standa að baki Volta og staðarins Harlem sem opnaði um miðjan desember. "Þó sömu eigendur séu að stöðunum þá eru þeir samt alveg ótengdir og gjörólíkir,“ segir Steindór. Volta verður til húsa að Tryggvagötu 22 og verður á tveimur hæðum. Hann nær yfir aftari hluta þess svæðis sem áður var Þýski barinn auk neðri hæðarinnar og kemur hann til með að taka um 300 gesti. Opnunarhátíð verður á Volta alla helgina. Hún hefst með tónleikahaldi á föstudagskvöldið þar sem hljómsveitirnar Hjaltalín, Ojba Rasta, Bloodgroup og Sóley stíga á stokk. Á laugardaginn verður síðan klúbbastemning þar sem breski plötusnúðurinn Tim Green þeytir skífum, auk tvíeykisins Gluteus Maximus og DJ Yamaho. "Við viljum skapa þarna klúbbastemningu að evrópskri fyrirmynd og til þess verðum við meðal annars með heimsklassa hljóðkerfi og metnaðarfulla lýsingu,“ segir Steindór. Aðgangseyrir er kr. 2.000 á föstudag og 1.000 á laugardag og miðar aðeins seldir í hurð.