Vidal óstöðvandi gegn Lazio

Juventus var í miklu stuði í kvöld og þá sérstaklega Arturo Vidal er liðið rúllaði yfir Lazio, 4-1.

Vidal skoraði tvö fyrstu mörk leiksins og lagði upp það síðasta fyrir Carlos Tevez. Mirko Vucinic komst einnig á blað hjá Juve.

Það var Þjóðverjinn ótrúlegi Miroslav Klose sem skoraði mark Lazio. Hann minnkaði þá muninn í 2-1 en það reyndist skammgóður vermir.

Juventus er því með fullt hús eftir tvær umferðir en Lazio er með þrjú stig.

Napoli er einnig með fullt hús eftir 2-4 sigur á Chievo í dag þar sem Marek Hamsik skoraði tvö mörk fyrir Napoli.