Higuain vill feta í fótspor Maradona hjá Napoli

Gonzalo Higuain, leikmaður Napoli, setur stefnuna á að feta í fótspor landa síns Diego Maradgona sem er goðsögn hjá ítalska félaginu.

Higuain vill vinna titla með Napoli og koma liðinu á sama stall og þegar Maradona var upp á sitt besta.

Maradona lék með Napoli á árunum 1984–1991 en hann lék 188 leiki fyrir félagið og skoraði 81 mark.

Higuain gekk í raðir Napoli fyrr í sumar frá Real Madrid og á að fylla það skarð sem Edison Cavani skilur eftir sig hjá liðinu.

„Cavani er farinn og fólk mun muna eftir öllum þeim mörkum sem hann skoraði fyrir félagið,“ sagði Higuain við Gazzetta dello Sport.

„Ég vill ekki að fólk muni aðeins eftir mörkunum mínum heldur þeim titlum sem ég skilaði til félagsins. Eina markmiðið mitt er að vinna titla, ekkert endilega að skora mörk.“