Volkswagen í Danmörku kaupir hlut í HEKLU hf

Danska hlutafélagið Semler, sem á og rekur umboð fyrir Volkswagen bifreiðar í Danmörku (Volkswagen, Audi, Porsche, SEAT og Skoda) hefur keypt helmingshlut í HEKLU hf. Eftir kaupin eru tveir hluthafar í félaginu. Semler samsteypan með 50% hlut og félagið Riftún ehf sem er í eigu Friðberts Friðbertssonar, forstjóra HEKLU hf sem einnig er með 50% hlut.

Friðbert Friðbertsson hafði milligöngu um kaup Semler á hlutnum, eftir að hann hafði eignast allt hlutafé í HEKLU hf. Lögfræðstofan Landslög og Fyrirtækjaráðgjöf Íslandsbanka voru ráðgefandi í ferlinu og viðskiptunum sjálfum. Ný stjórn HEKLU hf var kjörin á hluthafafundi félagsins og hana skipa; Kim Skovgaard Rasmussen sem jafnframt er stjórnarformaður. Meðstjórnendur eru  Jóhannes Bjarni Björnsson, Jón Eiríksson og Jens Bjerrisgaard.

„Þetta er mjög stór áfangi í sögu HEKLU, segir Friðbert. Við erum komin með afar reynslumikið og öflugt félag til liðs við okkur. HEKLA hefur verið söluhæsta bifreiðaumboðið á Íslandi síðustu ár og við finnum mikinn áhuga á okkar vörum. Þetta sáu dönsku félagar okkar og sjá spennandi markað hér á Íslandi. Það er ekki á hverjum degi sem erlend fjárfesting skilar sér til Íslands og við erum stolt af því að þetta hafi gengið í gegn.“

Kim Skovgaard Rasmussen er forstjóri Skandinavisk Motor Co. sem er innflutningsaðili á bifreiðum fyrir Semler samsteypuna. Hann er einnig nýkjörinn stjórnarformaður HEKLU hf. „Við erum að fjárfesta í góðu fyrirtæki", segir Kim. "Við þekkjum þennan markað mjög vel og höfum farið í samstarf af þessu tagi áður í öðrum löndum. Við höfum trú á íslenska markaðnum og Friðberti sem leiðtoga í öflugu teymi starfsmanna HEKLU. Okkar markmið er að tryggja sterka stöðu HEKLU á markaðnum. Við teljum allar forsendur vera til staðar, þannig að HEKLA geti áfram verið leiðandi afl á íslenska bifreiðamarkaðnum“.