Þessi lenti í hvirfilbyl en gengur enn

Eigandi þessa Ford Mustang bíls var einn hinna óheppnu þegar hinir öflugu hvirfilbylir gengu yfir í Oklahomafylki í Bandaríkjunum um daginn. Eins og sést á myndinni er hann einkar illa farinn, topplaus og laus við flesta óþarfa hluti eins og hurðir, húdd og bretti!

Eigandinn fann hann svona eftir að ósköpin höfðu dunið yfir, settist undir stýri og viti menn, bíllinn fór í gang og síðan hefur hann ekið honum  um heimabæ sinn óáreiddur og vonandi kátur með að eiga nú topplausan sportbíl eins og marga dreymir um.

Heimamenn sem bloggað hafa um bíl þennan hafa sagt með miklu þjóðernisstolti að ómögulegt sé að drepa það sem smíðað er í landi hinna frjálsu! Eitt er víst að ekki hefðu allir bílar þolað þetta og væru enn í notkun. Ætli Ford fyrirtækið færi honum ekki nýjan Mustang í þakklætisskyni fyrir að auglýsa með svo frumlegum hætti hvað bílar þeirra þola.