Emil lagði upp mark í mikilvægum sigri

Hellas Verona er enn í góðri stöðu í ítölsku B-deildinni eftir 2-1 sigur á Ternana á heimavelli í dag.

Emil Hallfreðsson spilaði allan leikinn og lagði upp síðara mark sinna manna með fyrirgjöf frá vinstri kantinum.

Hellas Verona komst í 2-0 snemma í síðari hálfleik en Ternana minnkaði muninn um miðjan hálfleikinn. Nær komust gestirnir þó ekki.

Liðið er í þriðja sæti deildarinnar með 67 stig, eins og Livorno sem er með örlítið betra markahlutfall. Sassuolo er með sjö stiga forystu á toppi deildarinnar, þrátt fyrir að hafa tapað fyrir Novara á útivelli í dag.

Tvö efstu liðin komast beint upp og því spennandi lokasprettur fram undan hjá Livorno og Verona. Næstu lið eru tíu stigum á eftir.