Impala með krafta í kögglum

Kemur nú af tíundu kynslóð og verður kynntur á bílasýningunni í New York.

Chevrolet Impala var ein af táknmyndum Bandaríkjanna þegar hann kom fram á sjónarsviðið 1958, þ.e. stór og aflmikil drossía. Nú er Chevrolet að kynna hvorki meira né minna en tíundu kynslóð þessa bíls og verður hann kannski einn af senuþjófunum á bílasýningunni í New York sem er að hefjast.

Bíllinn byggir á heilmikilli arfleifð Impala í gegnum áratugina en um leið yfir allri þeirri tækniframþróun sem orðið hefur á þessum tíma. Hann er 5,13 m á lengd og hjólhafið er hvorki meira né minna en 2,84 m. Impala kemur á 20 tommu álfelgum og undir vélarhlífinni er 3,6 l, V6 vél sem skilar 303 hestöflum. Með þessari vél og sex þrepa sjálfskiptingu hraðar þessi stóri bíll sér í 100 km hraða á 6,8 sekúndum. Vélin býr líka yfir gríðarlegu togi eða 358 Nm við 5.200 snúninga á mínútu. Engu að síður er eyðslan hófleg með nýrri spartækni sem stuðst var við í vélarhönnuninni.

En það er samt ekki einungis afl og laglegt útlit sem Impala snýst um. Hann gerir eiginlega tilkall til þess að falla í lúxusbílaflokk með frágangi og efnisvali í innanrýminu en ekki síst hátæknibúnaði sem þar er að finna. Að framan er hann með upphituðum körfusætum sem eru stillanleg á tíu vegu og hann kemur leðurklæddur með fullkomnu loftfrískunarkerfi og hljómtækjum með raddstýrikefi, lyklalausu aðgengi og ræsingu, hraðastilli með aðlögunarhæfni, tíu öryggispúðum, blindblettvara, svo fátt eitt sé nefnt. Impala kemur á markað nú á vordögum.