Mercedes Benz á smábílamarkaðinn

Yrði mitt á milli A-Class og Smart og ætti að keppa við Audi A1 og Mini.

Að undanförnu hefur æ oftar heyrst að Mercedes Benz ætli sér að smíða enn minni bíl en fyrirtækið býður nú með A-Class bílnum. Yrði sá bíll á milli hans og Smart bílsins í stærð. Ætti hann að keppa við Audi A1 og Mini.

Sá nýi yrði byggður á undirvagni sem Mercedes hefur þróað í samstarfi við Renault-Nissan. Svo langt á Mercedes að vera komið í áætlunum sínum að bíllinn hefur þegar fengið nafnið X-Class. Hann á að kosta undir 20.000 Evrum, eða 3,3 milljónir króna.

Vélar bílsins verða annaðhvort þriggja strokka og eins lítra vél eða fjögurra strokka og 1,5 lítra vél. Sagt er að stefna Mercedes Benz sé að koma með bílinn til sölu árið 2018 og þá í þremur útgáfum, sem stallbakur, venjulegur sedan og smár jepplingur.