Kynþokki og glamúr

Tískuvikan í Mílanó stendur nú sem hæst, en Emilio Pucci sýndi haust og vetrarlínu sína þar í gær. ,,Tíska snýst um gleði og hamingju. Ég vildi að þessi lína myndi láta þann sem klæddist henni geisla af gleði, bæði að utan og innan", sagði Peter Dundas, yfirhönnuður Pucci í viðtali við Vogue. Hann segir línuna vera innblásna af bæði sjöunda og áttunda áratugnum, en Dundas tókst að blanda saman mynstrum og litum sem voru einkennandi fyrir þá tíma og sameinaði þannig tímabilin á snilldarlegan hátt. Kögurjakkar, pallíettur, pastellitir og feldir. Útkoman varð full af frjálslegum kynþokka og glamúr.