Arftaki Ferrari Enzo

Verður framleiddur í 499 eintökum og er yfir 900 hestöfl.

Næsti framleiðslubíll frá Ferrari mun kosta eina milljón Evrur en sá bíll á að leysa af hólmi Ferrari Enzo. Aðeins verða framleiddir 499 bílar af þessari gerð, eða 100 fleiri eintök en af Enzo bílnum. Framleidd verða fleiri eintök til að svara síaukinni eftirspurn í Asíu, aðallega frá Kína. Bíllinn er víst þegar uppseldur.

Þegar sala Enzo hófst árið 2002 kostaði hann 665.000 Evrur en gengur nú kaupum og sölum á meira en 1 milljón Evra. Nýi bíllinn hefur vinnuheitið F150. Fiat, eigandi Ferrari hefur ekki í hyggju að birta myndir af þessum nýja bíl í heild sinni en hefur engu að síður birt tvær "teaser"- myndir af honum í eigin tímariti Ferrari.

Heimildir herma að nýi bíllinn sé yfir 900 hestöfl sem koma frá V12 vél og rafmótorum og er hann því tvinnbíll (Hybrid). Fyrir vikið er hann 40% eyðslugrennri en Ferrari Enzo. Hann verður 5,5 sekúndur í 200 kílómetra hraða. Yfirbygging hans verður úr koltrefjum og í heild vegur bíllinn 1.365 kíló. Hybrid kerfið í bílnum vegur 150 kíló.

Undirvagn þessa nýja bíls verður smíðaður á sama stað og Formúlu eitt bílar Ferrari eru smíðaðir. Í fyrra seldi Ferrari 7.318 bíla og jók söluna um 5% milli ára. Hagnaður óx um 12% og nam 45 milljörðum króna, sem var 14,4% af veltu.