Cassano: Það er ekki búið að jarða Inter

Ítalski farandframherjinn Antonio Cassano segir að það sé allt of snemmt að afskrifa lið hans, Inter, úr baráttunni á Ítalíu.

Inter hefur verið í basli undanfarnar vikur og er komið niður í fimmta sæti ítölsku úrvalsdeildarinnar.

"Það láta allir eins og það sé búið að jarða Inter. Það er ekki rétt. Við erum aðeins þrem stigum frá Meistaradeildarsæti, erum í 32-liða úrslitum Evrópudeildarinnar ásamt því að vera í úrslitum ítalska bikarsins," sagði Cassano.

Cassano kom til félagsins frá erkifjendunum í AC Milan og hann segist vera hæstánægður á nýja staðnum.

"Ég hef verið lengi í boltanum og farið víða. Það hefur aldrei verið eins góður andi í búningsklefanum hjá neinu liði eins og hjá Inter. Þetta er mjög sérstakur hópur og ég nýt mín hér."