Lék yfirmann konu sinnar

„Hún gaukaði hinu og þessu að mér," svarar Jóhannes Haukur Jóhannesson sem lék Már Guðmundsson, seðlabankastjóra, með einstaklega eftirminnilegum hætti í áramótaskaupinu.

Kona Jóhannesar, Rósa Björk Sveinsdóttir, starfar á hagfræðisviði spádeildar seðlabankans - Már er því yfirmaður hennar. Jóhannes hefur því ekki þurft að leita langt yfir skammt þegar hann tileinkaði sér takta seðlabankastjórans.

Persóna Más fékk þó heldur jákvæða yfirhalningu í skaupinu en þar kom hann fyrir sem hvítur riddari réttlætisins þar sem hann barðist meðal annars gegn „ofur- illmenninu" og „vesalingnum" Þorsteini Má Baldvinssyni, forstjóra Samherja - sem var einnig frábærlega leikinn af Gunnari Hanssyni.

Seðlabanki íslands og Samherji hafa tekist harkalega á eftir að fyrrnefnda stofnunin framkvæmdi húsleit hjá Samherja fyrr á árinu.

Jóhannes segist þó ekki aðeins hafa fengið góðar upplýsingar um smáatriði í fari Más frá Rósu, heldur hafi hann skoðað seðlabankastjórann vel í fréttum og viðtölum, sem tekin hafa verið við hann í gegnum tíðina.

„Ragna Fossberg [förðunarmeistari RÚV innskt. blm.] sá svo eiginlega um rest," segir Jóhannes Haukur og hlær.

Jóhannes viðurkennir í samtali við blaðamann að galdurinn felist aðallega í vörunum og drýldnum augnsvipnum.

Spurður um viðbrögð svarar Jóhannes því að hann hafi fengið jákvæð viðbrögð við sínu hlutverki. Hann hafi þó tekið eftir því að skaupið sé umdeildara í ár en oft áður.

„Mér fannst þetta persónulega mjög gott," segir Jóhannes Haukur og bætir við að hann hafi tekið eftir að almenningur gagnrýnir orðbragð skaupsins sérstaklega - sem var vissulega ekki fagurt á köflum - „en ég hélt bara fyrir eyrun á fjögurra ára dóttur minni þegar slíkt orðbragð var viðhaft," bætir hann við.

Spurður hvort stórleikur hans hafi komið konu hans í vandræðum í vinnunni svarar Jóhannes, „Hún er reyndar ekki mætt í vinnuna, en ég efast um að Már bíði eftir henni inni á skrifstofunni."