Tengdasonur Ísafjarðar

Tapio er menntaður guðfræðingur uppalinn í Rauma á vesturströnd Finnlands. Hann kom fyrst til Íslands árið 1989 og segir áhugann á Íslandi hafa skapast af lestri Íslendingasagna og bóka Halldórs Laxness strax í æsku.

Í þeirri ferð dvaldi hann hérlendis í hálft ár, vann við byggingu Ráðhússins í Reykjavík og í fiskvinnslu á Flateyri. Hann skrifaði bók um þá upplifun sína en Ísland kallaði enn á hann og hann sótti um kennarastöður í tíu íslenskum skólum.

Grunnskólinn á Ísafirði var sá eini sem vildi ráða hann og þangað fór hann og dvaldi í þrjú ár, mest af þeim tíma sem smíðakennari í grunnskólanum. Þar hitti hann núverandi konu sína, Huldu Leifsdóttur, sem flutti með honum til Rauma að þessum þremur árum liðnum og þar búa þau enn. Hann talar reiprennandi íslensku.