Frítt á Airwaves-tónleika á laugardag

Tónlistarhátíðin Iceland Airwaves býður upp á fría tónleika á NASA laugardagskvöldið 31. mars. Fram koma Sóley, Agent Fresco og breska gítarrokksveitin All the Young. Útvarpsstöðin XFM í London nefndi hljómsveitina eina af tólf bestu sveitunum sem stíga fram í dagsljósið á þessu ári, auk þess sem hún var tilnefnd sem efnilegasta sveitin hjá verslunum HMV.

Hægt verður að nálgast ókeypis miða á tónleikana á Midi.is frá hádegi fimmtudaginn 22. mars og einnig við hurð á NASA á tónleikakvöldinu. Iceland Airwaves fer fram dagana 31. október til 4. nóvember.