Emil lagði upp jöfnunarmark Hellas Verona

Emil Hallfreðsson var maðurinn á bak við jöfnunarmark Hellas Verona í ítölsku b-deildinni í dag. Verona gerði þá 1-1 jafntefli við Empoli á útivelli.

Riccardo Saponara kom Empoli í 1-0 á 58. mínútu og þannig var staðan þar til á fimmtu mínútu í uppbótartíma.

Emil átti þá fyrirgjöf á varnarmanninn Luca Ceccarelli sem jafnaði leikinn og tryggði Verona mikilvægt stig í toppbaráttunni.

Emil spilaði allan leikinn líkt og í undanförnum fjórum umferðum en hann hefur nú lagt upp fimm deildarmörk á tímabilinu.