Moratti: Sneijder ekki neyddur til að endursemja

Massimo Moratti, forseti Inter, segir ekkert til í því að félagið ætli sér að neyða Wesley Sneijder til þess að taka á sig launalækkun. Hollendingurinn hefur lítið spilað með Inter undanfarnar vikur.

Moratti segir ástæðu þess að Sneijder spili svo lítið aðeins knattspyrnulegs eðlis. Marco Branca, yfirmaður knattspyrnumála hjá félaginu, lét hafa eftir sér í vikunni að Sneijder myndi ekki spila fyrir Inter fyrr en hann hefði ákveðið framtíð sína. Í henni fælist að skrifa undir nýjan samning þar sem Hollendingurinn tæki á sig launalækkun.

„Þótt samningur sé í gildi er engu að síður í lagi að spyrja leikmann hvort til greina komi að breyta samningnum. Það breytir þó ekki þeirri staðreynd að leikmaðurinn spilar ekki í augnablikinu vegna tæknilegra ástæðna," segir Moratti.

„Augljóslega vill enginn missa leikmann í hans gæðaflokki og sem fjárfest hefur verið jafnmikið í og raunin er. Það væri líka stórundarleg ákvörðun að greiða honum himinhá laun og láta hann ekki spila. Ég tel hann andlega og líkamlega kláran til þess að spila. Þjálfarinn velur hins vegar liðið," segir Moratti.

Sneijder, sem síðast spilaði fyrir Inter í september, er launahæsti leikmaður liðsins. Árstekjur Hollendingsins 28 ára, eru um sex milljónir evra eða sem nemur tæpum milljarði íslenskra króna. Hann á tvö ár eftir af samningi sínum við ítalska félagið.