Eyjólfur skoraði sigurmark SønderjyskE undir lok leiksins

Einn leikur fór fram í dönsku úrvalsdeildinni í knattspyrnu í dag en Esbjerg og SønderjyskE mættust á Blue Water Arena, heimavelli, Esbjerg. Lasse Vibe, leikmaður SønderjyskE, kom gestunum yfir í upphafi síðari hálfleiksins en það tók heimamenn nokkrar mínútur að jafna metin þegar Jakob Ankersen skoraði fyrir Esbjerg.

Eyjólfur Héðinsson, leikmaður SønderjyskE, kom inná af varamannabekknum þegar um tuttugu mínútur voru eftir af leiknum og átti heldur betur eftir að koma við sögu. Það stefndi allt í jafntefli liðanna en á 90. Mínútu skoraði Eyjólfur sigurmark SønderjyskE eftir sendingu frá Daniel Christensen.

SønderjyskE er í sjöunda sæti deildarinnar með 17 stig en Esbjerg í því tíunda með 11 stig.