Fyrsti sigur Hellas Verona á tímabilinu

Emil Hallfreðsson fékk ekki tækifæri til að spila með Hellas Verona gegn Reggina, hans gamla félagi, þegar þau mættust í ítölsku B-deildinni í dag.

Hellas Verona vann leikinn, 2-0, með mörkum þeirra Simon Laner og Juanito Gómez Taleb. Emil var vitanlega ekki með þar sem hann er í miðri landsleikjatörn með íslenska landsliðinu.

Emil spilaði allan leikinn þegar að Ísland vann Noreg, 2-0, í gær og fór í dag með íslenska liðinu til Kýpurs.

Verona er nú með fimm stig eftir að hafa gert jafntefli í fyrstu tveimur leikjum tímabilsins. Liðið er sem stendur í fimmta sæti deildarinnar.