Kvikmyndanámskeið fyrir útlendinga hefjast í haust

Hópur kvikmyndagerðarmanna er að setja á stofn Reykjavik Film Academy sem mun bjóða upp á námskeið fyrir útlendinga frá og með haustinu.

"Við byrjum í haust með sex vikna kvikmyndagerðarprógramm fyrir útlendinga sem vilja upplifa Ísland og læra kvikmyndagerð í leiðinni," segir Steven Meyers. Hann er að setja á laggirnar kvikmyndaskólann Reykjavík Film Academy ásamt þeim Þorgeiri Guðmundssyni og Henry Bateman.

Áhersla verður lögð á leikstjórn og handritagerð á námskeiðunum sem fara fram á ensku. "Þetta er tækifæri fyrir upprennandi kvikmyndagerðarmenn hvaðan að úr heiminum sem vilja gera sína fyrstu stuttmynd eða bæta við kunnáttu sína," nefnir Þorgeir og Steven bætir við: "Ég var í þessum sporum á mínum yngri árum og var að leita að stað til að læra kvikmyndagerð í stuttan tíma.

Ég fór í árs prógramm í FAMU í Prag og það var stökkpallur fyrir mig. Ég notaði stuttmyndina sem ég gerði þar til að komast inn í meistaranám í leikstjórn í Columbia-háskólanum í New York."

Þorgeir og Steven kynntust við nám í Columbia. Þeir hafa báðir mikla reynslu af kvikmyndagerð og kennslu, þar á meðal við Kvikmyndaskóla Íslands. Henry, samstarfsaðili þeirra, kom svo inn í verkefnið eftir að hann heillaðist af Íslandi við tökur á heimildarmynd sinni Future of Hope, sem gerð var í kjölfar efnahagshrunsins.

Í framtíðinni stefna þeir á að bæta við fleiri tegundum námskeiða. Þá héldu þeir námskeið í síðustu viku fyrir börn á aldrinum sex til þrettán ára í Bíói Paradís. "Rúmlega tuttugu krakkar komu og bjuggu til stuttmyndir. Það gekk vonum framar og bíóið fylltist þegar fjölskyldur komu að sjá myndirnar," lýsir Steven spenntur fyrir framhaldinu. Hann bætir við að þó áherslan sé á útlendinga með áhuga á Íslandi taki þeir Íslendingum opnum örmum.

Nánari upplýsingar er að finna á Reykjavikfilmacademy.com.

hallfridur@frettabladid.is