Orðinn sóló en vill ekki afskrifa Ampop

Síðastliðinn fimm ár hefur Birgir Hilmarsson lifað af því að gera tónlist. Hann er þekktastur hér á landi fyrir störf sín með popprokk-sveitinni Ampop en verkefni hans síðustu misseri eru í tuga tali og hafa komið út um víðan heim. Nýverið lauk hann vinnslu á sinni fyrstu eiginlegu sólóplötu sem kemur til með að heita All we can be. Áður hafði hann þó gefið út plötu er hann gerði einn síns liðs en sú plata var gefin út undir hatti Blindfold. Það verkefni varð síðar að starfandi hljómsveit í Bretlandi þar sem Biggi hefur búið og starfað síðastliðin ár. En nýja platan er sú fyrsta sem gefin verður út undir hans eigin nafni, Biggi Hilmars. Í gær mætti Biggi í útvarpsþáttinn Vasadiskó á X-inu 977 og spilaði tvö lög beint af nýju plötunni. "Ég er búinn að vera gera svo mikið af auglýsinga- og kvikmyndatónlist síðustu árin að ég var kominn með hundleið," sagði Biggi m.a. í viðtalinu. "Ég þráði að fara gera eitthvað sem væri gert einungis fyrir gleðina að skapa verkið." Aðspurður um hljómsveitina vinsælu Ampop sagði hann að þeir félagar hefðu aldrei viljað gefa út formlega dánartilkynningu. "Við erum allir svo góðir vinir og ég og Kjartan vorum nú einmitt að semja saman um daginn. Svo eru líka lag á nýju plötunni minni sem var samið upphaflega fyrir Ampop". Biggi flutti svo upphafslag plötu sinnar, A place for us, einn og óstuddur með kassagítarinn. Afraksturinn má heyra hér.