Loksins, loksins! Frábært vatn í Norðurá

Þær fréttir berast nú frá Norðurá að eftir margra vikna þrautagöngu hafa rigningar síðustu daga skilað ánni frábæru veiðivatni. Loksins, loksins myndi einhver segja en Veiðivísir telur sig geta fært rök fyrir því að vatnið í Norðurá hafi ekki verið meira síðan opnunardaginn 5. júní!! Þá byrjuðu menn veiði 30 rúmmetra á sekúntu (m3/s) en í lok þess fyrsta dags var rennslið fallið niður í 17 m3/s.

Mikið hefur rignt á Holtavörðuheiði síðastliðna tvo sólarhringa. Norðurá nýtur góðs af því, en vatnshæð fór í tæplega 16 m3/s í gærdag.

Í frétt SVFR segir að í gegnum teljarann í Glanna hafa gengið um 1.200 laxar fram til þessa, en nokkur aukning varð í göngum upp stigann þegar að rigna tók. Það er þó staðreynd að nokkur hluti göngunnar fer Glannafossinn sjálfan þannig að reikna má með að þessi tala sé all nokkru hærri.

Ofan stigans hafa hins vegar aðeins veiðst um 160 laxar og því ljóst að Norðurá á nokkuð mikið inni hvað veiðina á dalnum áhrærir. Þar má í það minnsta finna vel rúmlega þúsund laxa, en veiðiálag fram til þessa er með minnsta móti og má kenna lélegum aðstæðum vikum saman um þá staðreynd.

Það gæti því komið nokkuð góður veiðikippur í Norðurá nú þegar að vatn hefur tekið að hækka, en áin var komin niður í 2.5 m3/s fyrri hluta þessarar viku. Nú er útlitið hins vegar miklu mun betra og fróðlegt verður að vita hvort rigningin hækkar ekki tölurnar úr Norðurá mikið frá því sem verið hefur undanfarnar vikur. Annað er reyndar varla hægt þar sem síðustu vikur hafa skilað 30 löxum og 16 löxum, sem eru tölur sem vart eiga sér hliðstæðu í sögu þessarar einstöku veiðiperlu.

svavar@frettabladid.is