Hvað veldur vinsældum erótískrar ástarsögu?

Önnur hver húsfrú í Bandaríkjunum er með erótísku ástarsöguna 50 shades of grey á náttborðinu hjá sér um þessar mundir. Sif Jóhannsdóttir hjá Forlaginu efast ekki um að bókin muni slá í gegn meðal íslenskra kvenna þegar hún kemur út í september á þessu ári.

Sif telur að vinsældir bókarinnar orsakist öðrum þræði af lipurlegum stíl höfundar og aðgengileika textans. Sif ræddi efnistök bókarinnar og vinsældir í Reykjavík Síðdegis í dag.

„Textinn er svo svakalega læsilegur. Hann grípur lesandann algerum heljartökum. Hann getur ekkert lagt bókina frá sér," segir Sif.

50 Shades of Grey er ástarsaga sem kom út á síðasta ári. Hún er fyrsta bókin í þríleik höfundarins E. L. James. Í bókinni er gengið lengra en almennt tíðkast í lýsingum á kynlífi. Hún hefur trónað á toppi sölulista víðsvegar um heiminn og selst í 20 milljón eintökum í 37 löndum.

Bókin segir frá ungri stúlku og auðjöfri sem hún kynnist. Þau taka saman en fortíð auðjöfursins einkennist af BDSM kynlífi en stúlkan hefur ekki upplifað nokkuð þvílíkt áður.