Bæði flug og fiskur í Aðaldal

Stangaveiðifélag Reykjavíkur og Flugfélagið Ernir hafa samið um sértilboð á flugi til Húsavíkur fyrir veiðimenn á svæðum SVFR fyrir norðan.

Samkvæmt upplýsingum frá SVFR fæst flug fram og til baka frá Reykjavík til Húsavíkur á 23.900 krónur ef veiðileyfi frá félaginu er framvísað.

Veiðisvæði SVFR fyrir norðan eru í Aðaldal. Þar eru stórlaxaslóðirnar á Nessvæðinu, veiðisvæði Árbótar og Tjarnar auk hinna víðfrægu urriðasvæða ofan virkjunar í Mývatnssveit og Laxárdal. Síðan eru urriðasvæðin neðan virkjunar; Staðartorfa, Múlatorfa og Presthvammur.