Indriði og félagar steinlágu í síðasta leiknum fyrir EM-frí

Indriði Sigurðsson og félagar hans í Viking steinlágu 3-0 í Fredrikstad í kvöld á móti næstneðsta liðinu í norsku úrvalsdeildinni í fótbolta. Indriði spilaði allan leikinn í vörninni.

Viking-liðið tapaði þarna í þriðja sinn í síðustu fjórum leikjum en liðið er í 10. sæti deildarinnar með 14 stig í 12 leikjum. Fredrikstad er áfram í 15. sæti en vann þarna aðeins sinn annan sigur á leiktíðinni.

Indriði, sem er fyrirliði Viking, fékk gult spjald á 23. mínútu leiksins. Ole Jørgen Halvorsen kom Fredrikstad í 1-0 strax á 13. mínútu og Simen Rafn bætti við öðru marki á 38. mínútu. Mouhamed Gueye innsiglaði síðan sigurinn á 73. mínútu.