Berlusconi ætlar ekki að reka Allegri

Silvio Berlusconi, eigandi AC Milan, er alls ekkert hræddur við að skipta um skoðun á hlutunum og hann hefur nú ákveðið að halda Massimiliano Allegri sem þjálfara Milan en nánast engar líkur voru taldar á því að hann fengi að þjálfa liðið áfram.

Bæði af því Milan vann engan titil og svo er Berlusconi sjálfur víst enginn sérstakur aðdáandi þjálfarans.

"Allegri á ár eftir af samningi sínum við okkur og ég sé enga ástæðu til þess að ræða þetta mál frekar," sagði Berlusconi sem er samt ósáttur við að Milan hafi ekki unnið ítalska meistaratitilinn.

"Við köstuðum þessu frá okkur. Við vorum á toppnum og í flottri stöðu. Ég verð samt að hrósa Juve sem spilaði frábærlega og hefur sýnt ótrúlega seiglu."