Forlan ætlar að vera áfram hjá Inter

Það hefur ekkert gengið hjá Diego Forlan í herbúðum Inter og búið er að orða hann við lið í Suður-Ameríku. Hann ætlar þó að vera áfram í herbúðum félagsins næsta vetur.

"Það er enginn möguleiki á því að hann fari til Suður-Ameríku. Vissulega vill hann spila í Brasilíu einn daginn en sá tími er ekki kominn. Hann vill vinna eitthvað með Inter fyrst," sagði umboðsmaður Forlan.

Forlan er aðeins búinn að skora tvö mörk fyrir Inter í vetur en mikils var vænst af honum fyrir tímabilið.

Hann hefur þó verið talsvert meiddur og þess utan engan veginn fundið sig í búningi félagsins rétt eins og hann lenti í vandræðum með að finna sig í búningi Man. Utd á sínum tíma.