Ranieri: Stjórnin stendur með mér

Claudio Ranieri gekk ágætlega að rífa Inter upp eftir að hann tók við liðinu snemma í vetur. Upp á síðkastið hefur síðan farið að síga á ógæfuhliðina á nýjan leik.

Inter tapaði svo mjög óvænt gegn Novara um helgina og ítalskir fjölmiðlar spá því margir að Ranieri muni fá að fjúka í vikunni eftir það neyðarlega tap.

Sem fyrr stendur Ranieri keikur og hann gekk svo langt að lýsa því yfir að öll stjórnin stæði á bak við hann.

"Félagið og Moratti forseti eru 100 prósent á bak við mig. Það er frábært samband á milli okkar og ég finn vel fyrir stuðningnum," sagði Ranieri brattur en hann er öllu vanur í bransanum.

Þar sem Fabio Capello er á lausu er þegar byrjað að orða hann við starfið en Capello hefur reyndar látið hafa eftir sér að hann hafi engan áhuga á því að þjálfa aftur á Ítalíu.