Ranieri neitar að hætta

Það er farið að hitna hraustlega undir Claudio Ranieri, þjálfara Inter, eftir þriðja tap Inter í röð. Þjálfarinn sjálfur hefur ekki í hyggju að segja starfi sínu lausu.

Inter féll niður í sjötta sæti ítölsku úrvalsdeildarinnar með 3-0 tapinu gegn Bologna.

"Við erum ekki að leggja okkur alla í verkefnið. Við erum að ganga í gegnum erfitt tímabil," sagði Ranieri.

"Við verðum að axla ábyrgð á okkar leik og biðja stuðningsmenn okkar sem og stjórnina afsökunar. Við áttum vissulega von á erfiðum leik en enginn átti von á þessari útkomu."

Þegar er byrjað að orða hina ýmsu þjálfara við starfið og með sama áframhaldi fær Ranieri örugglega að fjúka.