Uppruni og saga framrúðunnar

Fáum kemur líklega á óvart að framrúðan var upphaflega fundin upp til þess að koma í veg fyrir blástur framan í bílstjórann. En á sínum tíma, í byrjun 20. aldar þegar „hestlausir vagnar" keyrðu um götur, þurfti að finna eitthvað upp til að halda smásteinum, flugum og ryki frá augum bílstjórans sem varð meira vandamál eftir því sem hraði farartækjanna jókst. Fyrstu framrúðurnar áttu það til að brotna og skaða ökumenn og farþega illilega. Bílaframleiðandinn Henry Ford ákvað að stemma stigu við því með því að láta framleiða í bíla tvöfalt gler sem var límt saman með sellúlósa. Í Evrópu notuðust menn hins vegar aðallega við hert gler allt fram á 8. áratuginn. Það þoldi mikið álag en átti það til að brotna í þúsund litla mola.